Hen Gapel John Hughes, Pontrobert

Clywsom eitem ar Radio Cymru’n ddiweddar yn rhoi sylw i’r argyfwng sy’n wynebu’r Hen Gapel ym Mhontrobert, a chyhoeddwyd manylion apêl newydd a lansiwyd drwy’r papurau bro i geisio codi arian.  Cawsom ninnau neges gan Nia Rhosier yn egluro beth yw natur y broblem bresennol:

Sefyllfa Hen Gapel John Hughes Pontrobert (Gradd II*) a adferwyd gennym ni yma yn Sir Drefaldwyn gyda chefnogaeth Cymru gyfan ym 1995 a’i droi yn Ganolfan Undod ac Adnewyddiad Cristnogol yw bod y to yn gollwng ers blynyddoedd a’r adeiledd yn dioddef o’r herwydd. 

Gyda’r Pwyllgor Llywio yn heneiddio a’r Trysorydd a minnau (Ysgrifennydd) wedi dioddef salwch yn 2017 a diffyg cael pobl iau i ymuno â’r Pwyllgor, mae’n amser pryderus am fod angen codi £80,000 ar gyfer to newydd. Mae “Apêl y Llechen” ar i bobl brynu llechen am £10 wedi ymddangos ym mhapurau bro Cymru yn ddiweddar fel ein hymdrech ddiweddaraf i godi arian. Buom mewn cysylltiad â “ADDOLDAI CYMRU” (Welsh Religious Buildings Trust) i ofyn a fyddai’n barod i gymryd cyfrifoldeb dros ddyfodol yr adeilad gan fod ein Hymddiriedolwyr yn barod i’w drosglwyddo iddynt am ddim, ond hyd yma ni fu hyn yn bosibl oherwydd eu bod hwythau hefyd yn brin o arian!

Mae modd cyfrannu at yr apêl drwy ddilyn y ddolen hon.

Gweddiwn am arweiniad Duw.

Nia Rhosier