SEITHFED SUL ADFERIAD CYMRU

Bydd dydd Sul 28ain o Hydref, 2018, yn garreg filltir arall yn hanes y frwydr yn erbyn dibyniaeth ar alcohol, cyffuriau ac ymddygiadau niweidiol eraill yng Nghymru.

Unwaith eto eleni, nodwyd Sul fel Sul Adferiad i annog eglwysi nid yn unig i ystyried sefyllfa’r rhai sy’n dioddef o ddibyniaeth o ryw fath, i ddysgu mwy am eu sefyllfa, eu hangen a’r help sydd ar gael trwy ymdrechion mudiadau megis y Stafell Fyw, ond hefyd i weithredu yn ymarferol i estyn cymorth.  Gall y cymorth olygu cyfraniad ariannol tuag at y gwaith i rai, tra y bydd eraill yn cymryd sylw newydd o’r anogaeth sydd yn Hebreaid 13, 3 “Daliwch ati i gofio’r rheiny sy’n y carchar, gan feddwl sut brofiad fyddai hi i fod yn y carchar eich hunain!”  Efallai mai carchar llythrennol sydd dan sylw awdur y llythyr at yr Hebreaid, ond ar Sul Adferiad cofiwn fod caethiwed dibyniaeth ar alcohol, cyffuriau, bwyd, rhyw, gamblo a mwy, yn garchar i gymaint o bobl heddiw

Paratowyd y gwasanaeth gan y Parchedig Margaret Le Grice a chyfieithwyd gan y Parchedig Denzil I John (ar wahân i’r rhannau o Wasanaethau’r Eglwys yng Nghymru). Mae’r gwasanaeth yn seiliedig ar 12 Cam yr Alcoholigion Anhysbys.

Ceir manylion y gwasanaeth a phoster YMA

Nodiadau am y gwasanaeth 

1   Mae’r gwasanaeth mewn isadrannau gyda chyflwyniad a diweddglo. Mae pob adran yn cynnwys myfyrdod fel cyflwyniad, darlleniad o’r Beibl, amser tawel, gweddi ac emyn neu siant Taize.  Nid oes pregeth.

2   Mae’n bosibl y bydd eglwysi na all ddefnyddio’r gwasanaeth hwn ar 28 Hydref am ba bynnag reswm. Gellir defnyddio un o’r adrannau neu’r eiriolaeth mewn cyd-destunau eraill, e.e. grŵp gweddi, astudiaeth Feiblaidd neu gyfnod defosiynol byr mewn math arall o gyfarfod. Byddai’n briodol gwneud hyn ar unrhyw adeg yn ystod y deng niwrnod o 18 Hydref i 28 Hydref. Diwrnod y Sant Luc yw 18 Hydref pan fyddwn yn gweddïo dros weinidogaeth iacháu ym mhob ffurf.

3   Mae’r gwasanaeth yn fyfyrdodol.  Cofiwch ei arwain yn araf ac yn fyfyriol.  Argymhellir munud ar gyfer yr amser tawel. Mae’n amhosibl brasamcan hyd cyfnod o dawelwch ond pa beth bynnag fyddwch chi’n ei ddefnyddio fel amserydd, cofiwch na fydd yn cadw sŵn!

4   Cofiwch roi darn o bapur a phensil i bawb yn y gynulleidfa.

5   Mae’r rhifau wrth ochr yr emynau Cymraeg o Ganeuon Ffydd.  Gellir cael y gerddoriaeth ar gyfer y siantau Taize ar www.taize.fr/en_article10308.html.